– Азат, «Тобылдың», барша Қостанайдың жеңісі құтты болсын!
– Көп рақмет! Өз басым бұл жеңісті осы өңірдің халқына арнағым келеді. Өйткені олар бұл күнді талай жыл күтті. Бұрын­ғыларды айтпағанның өзінде соңғы он жылда «Тобыл» алдыңғы қатарлардан көрініп келді. Үнемі жүлдеге ілініп жүрді. Күмісіміз де, қоламыз да жетеді. Ел кубо­гындағы жеңістеріміз де бар. Интертото кубогын да жеңіп алғанбыз. Қоржынымызда тек ел чемпиондығы ғана жетіспей келген еді. Енді міне, бұған да қол жеткіздік. Осы аралықта қаншама сәтсіздіктерімізге қарамастан, командамыздан теріс айналып кетпеген жанкүйерлерге мың да бір рақмет айтқым келеді. Сол үшін бұл чемпиондыққа басқалардан гөрі Қостанай тұрғындары лайықтау.

– Дегенмен, шыны керек, маусым­ның екінші кезеңінде «Тобылдың» ойын өрнегі жүрмей қойды. «Биыл да бас жүлдеден айырылып қаламыз-ау» деген қорқыныш бойыңызды билеген жоқ па?
– Расын айтқанда, мұндай ой, мұндай қорқыныш командамыздағы барлық фут­болшының бойын билеген шығар. Қолда тұрған чемпиондықтан айырылып қала­мыз ба деп қорыққанымызды жасыр­маймын. Басты қарсыласымыздан 12 ұпайға алда келе жаттық та, сәтсіздікке ұшырай бас­тадық. Бірақ дәл уақытында жинақталдық. Өз басым, «Тобылдың» биыл чемпион атанатынына сенімді едім.

– Құпия болмаса, айтып өтсеңіз, соңғы ойындарда қалай жинақ­талдыңыздар? Бойларыңызды тіктеуге не түрткі болды? Әлде бас бапкер Равиль Сабитовқа «қолына қамшы алуына» тура келді ме?
– Әлбетте, Руфаилович біздің бұл атаққа жетуімізге көп көмегін тигізді. Командамыздың өткен жылғыдан да құлпырып кетуіне Сабитовтың қосқан үлесі зор. Дегенмен маусым соңына қарай, шынымен де, ойынымызда құлдырау бай­қалды. Әсіресе өз алаңымызда «Ақтө­беден» 2:5 есебімен жеңілгеніміз масқара болды. Бұл ойыннан кейін көптеген әңгімелер тарала бастады. «Тобылдың» чемпион атанатынына тек қостанайлықтар ғана емес, бүкіл қазақстандықтар күмән­дана бастады. Сөйтіп, футболшылармен жиналып, жігіттерше әңгімелесуімізге тура келді. Клуб басшылығынан ешкім болған жоқ. Тіпті бас бапкерге де айтпай, өзіміз ғана жиналдық. «Жігіттерше» дегенімді дұрыс түсінгеніңіз жөн. Ешқандай төбелес, келіспеушілік болған жоқ. Тек қателік­терімізді саралап, қалған ойындарда соңғы күшімізге дейін алаңда қалдыруға уәде еттік.

– Несімен қызықты болды?
– Мәселен, бұрын 3-4 тур бұрын-ақ жеңімпаздың есімі белгілі болатын. Ал бұл жолы соңына дейін жанкүйерлер мен футболшылар демдерін іштеріне тартып отырды. Оның үстіне, федерацияның бірінші кезеңнен кейін командаларды екі топқа бөліп тастағаны дұрыс болды. Нағыз қызық осы кезде басталды.

– «Тобылдың» чемпиондығына дауласпаймыз. Дегенмен Қостанайдың командасы үшін ең қиын қарсылас қай клуб болды?
– Қай ұжым болмасын, «Тобылға» қар­сы ерекше дайындалып ойнады. Алайда «Ақтөбе» мен «Локомотивті» ерекше атап өтпеске болмайды. Бұл ұжымдармен текетіресу қай кезде болмасын оңайға түскен жоқ. Оған осы командалармен өткізгендегі нәтижелер куә. «Ақтөбені» баяғыдан бері білеміз. Олардың әлеуетін басында-ақ байқағанбыз. Ал осы жылы өз басыма «Локомотивтің» ойын өрнегі ұнады. Елордалық клуб биыл барлық турды біркелкі, өз ойындарынан танбай өткізді. «Локомотив» ел чемпионатында толық ашыла алмағанымен, ел кубогы жолында көсілді. Мен, негізі, ел кубогынан «Тобыл» шығып қалғаннан кейін өзімнің туған қаламның намысын қорғайтын «Ордабасыға» жанкүйер болғанмын. Бірақ өкінішке қарай, «Ордабасы» финалға жетпей сүрінді. Сөйтіп, ақтық сында «Локомотив» үшін тақымымды қысып отырдым.

– Азат, енді өзіңіз жайында әңгімелессек. Өзіңіздің биылғы өнер көрсетуіңізге қандай баға бересіз?
– Жыл жаман өтті деп ойламаймын. «Тобыл» ел чемпионы атанды. Бұл – менің де бірінші «алтын тәжім». Мен команданың негізгі ойыншыларының бірі болдым. Яғни чемпиондыққа менің де тікелей қатысым бар. Ұлттық құрама сапына да шақырылып жүрдім. Дегенмен мұнымен тоқтап қалмау керек. Әлі де жетіле түсуіміз керек. Менің ендігі мақсатым – қаңтар айында өтетін «Достастық кубогын» жеңіп алу. Өйткені Қазақстанның бірде-бір клубы бұл турнирде әлі жеңімпаз атанбапты.

– Өзіңнің жеке жоспарың туралы айтып өтсең, команда ауыстыратын ойың жоқ па?
– Қазіргі басты мақсатым – «Тобылда» қалу. Дегенмен басқа ұжымдардан түсетін ұсыныстарды да қарастыруға әзірмін. Өйткені қазір менің «басым бос». Яғни биыл «Тобылмен» келісімшартым аяқталды. Алда не боларын уақыт көрсете жатар.

– «Тобыл» басшылары келісімшартты ұзартуға ұсыныс жасаған жоқ па?
– Ресми түрде әңгімелеспедік. Дегенмен олардың маған деген ниеттері түзу. Бізге еш нәрсе ойламай демалып, тынығып алуға тапсырма берді. Енді демалысымыз біткен соң, басшылық келісімшарт үстеліне шақырады деп ойлаймын.

ShareTweet